വാക്സിൻ വിതരണത്തിൽ അമേരിക്കയെ മറികടന്ന് ഇന്ത്യ. അമേരിക്കയിൽ ഇതുവരെ 32.33 കോടി ഡോസ് വാക്സിനാണ് വിതരണം ചെയ്തതെങ്കിൽ ഇന്ത്യ ഇതുവരെ 32.36 കോടി ഡോസ് വാക്സിനാണ് നൽകിയത്. രാജ്യത്ത് പ്രായപൂർത്തിയായവരിൽ 5.6 ശതമാനമാണ് നിലവിൽ പൂർണമായും വാക്സിൻ സ്വീകരിച്ചത്. അതേസമയം അമേരിക്കയിൽ ആകെ ജനസംഖ്യയുടെ 40 ശതമാനം പേരും വാക്സിൻ സ്വീകരിച്ചതായി വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു.
പുതിയ വാക്സിൻ നയം നടപ്പിൽ വന്നതിനു ശേഷം മാത്രം 3.91 കോടി ഡോസ് വാക്സിൻ ഇന്ത്യയിൽ വിതരണം ചെയിതിട്ടുണ്ട്. കാനഡ, മലേഷ്യ, സൗദി അറേബ്യ തുടങ്ങിയ രാജ്യങ്ങളിലെ ജനസംഖ്യയേക്കാൾ കൂടുതലാണ് ഇന്ത്യയിൽ ഇതുവരെ നൽകിയ വാക്സിൻ ഡോസുകളുടെ എണ്ണമെന്ന് കേന്ദ്ര ആരോഗ്യമന്ത്രാലയം ട്വീറ്റ് ചെയ്തു.
