ജമ്മു കശ്മീരിൽ ഭീകരരുടെ ആക്രമണത്തിൽ ജമ്മു കശ്മീർ അപ്നി പാർട്ടി നേതാവ് കൊല്ലപ്പെട്ടു. ദക്ഷിണ കശ്മീരിലെ കുൽഗാമിലാണ് സംഭവമെന്ന് പൊലീസ് പറഞ്ഞു. അപ്നി പാർട്ടി നേതാവ് ഗുലാം ഹസൻ ലോണ്‍ ആണ് വെടിയേറ്റ് മരിച്ചത്. പാർട്ടി അധ്യക്ഷൻ അൽത്താഫ് ബുഖാരി കൊലപാതകത്തെ അപലപിച്ചു.
പത്തു ദിവസത്തിനിടെ കൊല്ലപ്പെടുന്ന നാലാമത്തെ കശ്മീരി രാഷ്ട്രീയ നേതാവാണ് ഗുലാം ഹസന്‍ ലോണ്‍. ജമ്മു കശ്മീരിന്റെ പ്രത്യേക പദവി കേന്ദ്രസർക്കാർ റദ്ദാക്കി, ഏഴ് മാസങ്ങൾക്ക് ശേഷം 2020 മാർച്ചിലാണ് ജമ്മു കശ്മീർ അപ്നി പാർട്ടി രൂപീകരിച്ചത്. മെഹബൂബ മുഫ്തിയുടെ പീപ്പിൾസ് ഡെമോക്രാറ്റിക് പാർട്ടി (പിഡി)യുടെ മുൻ നേതാവാണ് അൽത്താഫ് ബുഖാരി.
അതിനിടെ, രജൗറിയില്‍ ഭീകരരുമായുണ്ടായ ഏറ്റുമുട്ടലില്‍ ഒരു സൈനികന്‍ വീരമൃത്യു വരിച്ചു. രണ്ടു ജവാന്മാര്‍ക്ക് പരുക്കേറ്റു. ഒരു ഭീകരനെ വധിച്ചു.
