ഒരു ഒളിമ്പിക്‌സില്‍ ഏഴു മെഡലുകള്‍ നേടുന്ന ആദ്യ വനിതാ നീന്തല്‍ താരമെന്ന റെക്കോഡ് ഇനി ഓസ്‌ട്രേലിയയുടെ എമ്മ മക്വിയോണിന് സ്വന്തം. ഞായറാഴ്ച വനിതകളുടെ 50 മീറ്റര്‍ ഫ്രീസ്റ്റൈിലും 4×100 മീറ്റര്‍ മെഡ്‌ലെ റിലേയിലും സ്വര്‍ണം നേടിയതോടെയാണ് എമ്മയുടെ ടോക്യോയിലെ മെഡല്‍ നേട്ടം ഏഴായി ഉയര്‍ന്നത്. നാലു സ്വര്‍ണവും മൂന്ന് വെങ്കലവുമാണ് എമ്മ ടോക്യോയില്‍ സ്വന്തമാക്കിയത്.
50 മീറ്റര്‍ ഫ്രീസ്റ്റൈല്‍, 100 മീറ്റര്‍ ഫ്രീസ്റ്റൈല്‍, 4×100 മീറ്റര്‍ ഫ്രീസ്റ്റൈല്‍ റിലേ, 4×100 മീറ്റര്‍ മെഡ്‌ലെ റിലേ എന്നിവയിലാണ് എമ്മ സ്വര്‍ണം നേടിയത്. 100 മീറ്റര്‍ ബട്ടര്‍ഫ്‌ളൈ, 4×200 മീറ്റര്‍ ഫ്രീസ്റ്റൈല്‍ റിലേ, 4×100 മീറ്റര്‍ മെഡ്‌ലെ റിലേ എന്നിവയില്‍ വെങ്കലവും.
ഇതോടെ ഒരു ഒളിമ്പിക്‌സില്‍ ഏഴു മെഡലുകള്‍ നേടിയ നീന്തല്‍ താരങ്ങളുടെ പട്ടികയില്‍ മൈക്കല്‍ ഫെല്‍പ്‌സ്, മാര്‍ക്ക് സ്പിറ്റ്‌സ്, മാറ്റ് ബിയോണ്‍ഡി എന്നിവര്‍ക്കൊപ്പം ഇടംപിടിക്കാനും 27-കാരിയായ ഈ ബ്രിസ്‌ബെയ്ന്‍ താരത്തിനായി.
ഒളിമ്പിക്‌സില്‍ ഇതോടെ അഞ്ച് സ്വര്‍ണവും രണ്ട് വെള്ളിയും നാല് വെങ്കലവുമടക്കം എമ്മയ്ക്ക് ആകെ 11 മെഡലുകളായി.
